أحمد جمال زيادة : آفة حارتنا النسيان أو الهبل
صحفيون ضد التعذيب
أحمد جمال زيادة يكتب رسالة من داخل محبسه ” خلف القضبان ..و أشياء أخري”
في مره من المرات .. قابلت بالصدفه نائب مأمور قسم تاني مدينه نصر في مكتب رئيس مباحث السجن نائب مأمور قسم تاني هو بنفسه الي قبض عليا ، و أول ما شاف نظراتي الاستحقاريه ليه ضحك و سألني..
إنت تعرفني و لا ايه ؟ !
قلتله مفيش حاجه ممكن تخليني انسي الشخص اللي بسببه عمري بيضيع في السجن
سكت شويه و بيفكر ..فكملت كلامي ..
يوم 28 /12 /3013 عند السلم اللي عند جامعه الازهر كان فيه شاب معاه كاميرا و رايح يصور إشتبكات الجامعه فإنت وقفته و قلتله ، أنت جاي تصورنا احنا طيب يا ابن الـ… صور ولاد الـ.. اللي بيحرقوا في الجامعه
و بعد كده ضربته فالعساكر و المخبرين حسوا أن حضرتك هتتعب قكملوا ضرب
سكت ونفس ضحكه اللامبالاه علي وشه .. فقلتله , انا بقي الشاب ده..
عمل نفسه متفاجأ و قال ..
هو أنت لسه من ساعتها في السجن ؟! أنا كنت بفحصك مش أكتر و مكنتش أعرف إنك هتطول كده ..
قلتله عدا سنه من يوميها بسبب إنك بتفحصني !!
قاللي إن العيب مش عنده العيب عند النيابه و القضاء ” الباشا بيتهم القضاء !!”
قلتله ، ميهمنيش العيب عند مين بس بما أن القدر جمعني بيك فأحب أقولك أني عمري ما هسامحك علي العمر اللي بيضيع و إن أكيد هنقف قدام ربنا و نتحاسب و أبقي شوف هتقول أيه ؟! بعد إذنك ، و سبت المكتب و مشيت ،ندهلي رئيس المباحث و سألني إنت قريب علاء عبد الفتاح ؟! قلت لا..
قاللي طيب نصيحه حاول تختفي و متظهرش في أي حاجه في السجن عشان كل حاجه بتوصل لأمن الدوله،و أمن الدوله عمله عنك تقرير مش كويس، بيقوله إنك بره السجن كنت بتنظم مظاهرات و جوا السجن عملت دعوه للإضراب عن الطعام ، دي نصيحه أخويه يا أحمد .
2
مأمور قسم تاني مدينه نصر بنفسه بيحاول اقناعي بأني افك الاضراب و أنه مش هيفيدني و الدليل محمد سلطان حاول يوصللي أنه متعاطف معايا و انه بيتمني خروجي من السجن ..
قلت لما حضرتك بتتمنى خروجي من السجن اعتقلتوني ليه ؟!
قاللي أن اكيد في حاجه غلط و أنهم في قسم تاني كانوا بيعاملوني كويس !!
قلت واضح أن حضرتك مشفتش حفلة الضرب و الاهانه الصبح و الكهربا و التعذيب بالليل و التشريفه و الحيطان اللي كانت متغرقه دم يوم 28 /12 /2013،و البنات اللي عددهم 18 و متهمين بحرق كليه تحاره بنبن مع أن ازهر بنين مبيدخلش فيه بنات !!
اتعصب فجأه و كأني شتمته و بعد كده ما كان حبسي غلط و بعد ما كان متعاطف معايا قاللي .
إن امثالي لازم يبقوا في السجن و أني مليون الـ 100 عملت حاجه عشان كده انا هنا .. سبحانه الله !!
3
أمن الدوله بتحقق معايا للمره الثامنه أو المره التاسعه ، مش فاكر ، عشان في التفتيش لقوا معايا ممنوعات مقالات مطبوعه من النت لبلال فضل و رسايل من احمد ماهر و محمد عادل و رساله من عم صلاح أبو جيكا ، و رسمه لواحد ماسك كاميرا و حواليه عساكر باسلاح و الشوم
وسط التحقيق قاللي .. المفروض تبقي خجول إنك عضو في 6 ابريل !!
رديت بابتسامه .. بالعكس المفروض أن حضرتك اللي تبقي خجلان من كونك ضابط في أمن الدوله .. إحنا مقتلناش خالد سعيد و لا سيد بلال و لا عذبنا حد !!
4
تاريخ اعتقالي 28 /12 /2013 يعني 317 يوم حبس احتياطي بحسابات السجن أنا كده تخطيت سنه كامله و 39 يوم عشان اتمسكت بكاميرا بس الباشا اتدايق اني ملحقتش اصور و لاد الـ….جوا الجامعه !!
مكنتش أعرف ان مهنه مصور صحفي خطر علي الدوله كده معندناش صحفيين في السجون
5
من نصف سنه تقريبا و لله الحمد و بالتحديد في شهر ابريل كانت اخر جلسه ليا و بعدها اتحولت جنايات يعني انا بلطجيأ أو ارهابي و لحد الآن لسه متحددليش جلسه !!
بس ليه يتعبوا نفسهم و ترحيلات و أمن و قضاء إعدموني أحسن !!
6
76 يوم اضراب عن الطعام العادي في أبو زعبل ان الدكتور بيستدعيني عشان يتطمن اني مش هموت دلوقتي و بعد كده يكتب تقرير إن حالتي جيده و دايما يقولي يا ريت تفك الاضراب عشان أنا مش ناقص وجع دماغ مش كفايه بيصحوني من نومي و يقولوا في مسجون تعبان أنا مبعرفش انام هنا !! ..مش هعلق هنا .
7
كان نفسي أتواجد فى جنازه هشام رزق صاحبي اللي زارني مرتين في السجن بس ملحقش يجي الزياره الثالثه .
و كان لازم ابقي موجود في الذكري السنويه لصديق العمر الشهيد احمد المصري اللي كان واللى كل أصحابي اعتقلوا في العزا بتاعه و الداخليه اتهمتهم بالتظاهر,,, و ذكري استشهاد جيكا التانيه قربت و للأسف مش هكون فيها ,,,
و زعلان علي ممدوح جمال الي زارني من 25 يوم تقريباً و وعدني أنه هيعمل المستحيل عشان أخرج بس ملحقش يعمل المستحيل و اعتقلوه هو كمان !! و حاسس بالذنب عشان رفيقي عماد اللي أجل فرحه لاجل غير مسمي و مش عايز يفرح غير إلا لما اخرج ….
علي فكره سألت نفسي انا بكتب كده ليه ؟! ملقتش رد غير . ما انت ياما كتبت ,, و بعدين ؟! .. بس برده عندي اصرار أكتب و مش مهم النتيجه ، مش هقبل نصيحه رئيس المباحث أو تهديده بأني لازم اسكت عشان اخرج لو الصمت هيخرجني فمش عايز اخرج !!
خاتمه
” محاكم التفتيش كان فيها كل انواع التعذيب من أجل القضاء علي البروتستانت لكن البروتستانت متقضاش علية هتلر عمل مجازر لليهود للقضاء عليهم ، و لما خالفه بعض الاشتراكيين اتهمهم بالعماله و حاول يقضي عليهم بس لا اليهود انتهوا و لا الاشتراكيه اختفت !!
اسرائيل بجرائهما و اسلحتها المدمره مقدرتش تقضي علي فلسطين رغم تخاذل كل جيرانها عنها ، لان لسه في ناس فلسطينين ممكن يضحوا بحياتهم عشان فلسطين
جمال عبد الناصر فتح سجون للإخوان و اكيد في كتب تاريخ بتحكي عن امن الدوله و السجون العسكريه ايام عبد الناصر و رغم كل التعذيب و القتل ، الاخوان منتهوش
السيسي متعلمش الدرس من التاريخ ، آفة حارتنا النسيان أو الهبل ..
فاكر أنه هيقدر يقضي علي كل اللي ليه علاقه بثوره 25 يناير و علي كل اللي رفض أنه يمشي مع القطيع فإعترض علي كل المجازرو سفك الدماء و الاعتقالات أو حاول يوصل الحقيقه للناس ، و كله تحت مسمي القضاء علي الارهاب !!
فتح السجون من جديد ، السجون للجميع ، بس السجون عمرها ما كانت حل و بكره هتشوف !!
المصدر
- تقرير:أحمد جمال زيادة : آفة حارتنا النسيان أو الهبلموقع: صحفيون ضد التعذيب